வேலூர் மாவட்டம் ஆற்காடு அருகே, கணவர் மற்றும் குழந்தையை காணவில்லை என புகார் அளித்த பெண், அவர்களை தானே கொன்று புதைத்ததை விசாரணையில் ஒப்புக்கொண்டுள்ளதாக போலீசார் கூறியுள்ளனர்.

வேலூர் மாவட்டம் ஆற்காடு அருகே, கணவர் மற்றும் குழந்தையை காணவில்லை என புகார் அளித்த பெண், அவர்களை தானே கொன்று புதைத்ததை விசாரணையில் ஒப்புக்கொண்டுள்ளதாக போலீசார் கூறியுள்ளனர்.

 மேலும் சடலங்களை தோண்டி எடுக்கும் நடவடிக்கை முடுக்கிவிடப்பட்டுள்ளது.
வேலூர் மாவட்டம் ஆற்காடு அடுத்த தாஜ்புரா மந்தைவெளி பகுதியை சேர்ந்தவர் ராஜா. 25 வயது இளைஞரான இவர், எலக்ட்ரிசீயனாக பணிபுரிந்து வந்தார். அதேபகுதியை சேர்ந்த மற்றொரு சமுதாயத்து பெண்ணான தீபிகாவை 2 ஆண்டுகளுக்கு முன்னர் காதல் திருமணம் செய்துள்ளார்.
ராஜா-தீபிகா தம்பதிக்கு பிரனீஷ் என்ற ஒரு வயது குழந்தை இருந்தது. இந்நிலையில், கடந்த 13ம் தேதி முதல் தனது கணவர் மற்றும் குழந்தையை காணவில்லை என ஆற்காடு கிராமிய காவல் நிலையத்தில் தீபிகா நேற்று புகார் அளித்தார். இதன் அடிப்படையில், போலீசர் உடனடியாக தீபிகாவிடமிருந்து விசாரணையை துவங்கினர்.
ராஜாவின் செல்போன் எண்ணை வைத்து அவர் இருக்கும் இடத்தை கண்டுபிடித்துவிடலாம் என்ற அடிப்படையில் போலீசார் கேட்டபோது, தன் கணவர் செல்போனை வீட்டிலேயே வைத்துவிட்டு சென்றுவிட்டார் என்று தீபிகா கூறியுள்ளார். மேலும் விசாரணையில் முன்னுக்கு பின் முரணாக பதில் அளித்துள்ளார்.
இதனால் சந்தேகம் அடைந்த போலீசார் தீபிகாவை தீவிர விசாரணை செய்துள்ளனர். கணவர் ராஜா மற்றும் குழந்தை பிரனீசை கொலை செய்து, வீட்டின் அருகே உள்ள சாத்தூர் ஏரிக்கரையில் புதைத்துவிட்டதாக தீபிகா கூறியதாப போலீசார் தெரிவித்துள்ளனர். புதைத்த இடம் என்று கூறி ஒரு இடத்தையும் போலீசாரிடம் காண்பித்துள்ளார்.
அங்கு காவல் துணை கண்காணிப்பாளர் கலைசெல்வன் ஆய்வு மேற்கொண்டார். உடல்களை புதைத்ததாக தீபிகா கூறிய இடத்தில் இருந்து துர்நாற்றம் வரும் நிலையில், அங்கு தோண்டிப் பார்க்க போலீசார் முடிவுசெய்துள்ளனர். ஆற்காடு வட்டாட்சியர் சம்பவ இடத்தில் இன்று காலை விசாரணை மேற்கொண்டதால் அப்பகுதில் போலீசார் நிறுத்தப்பட்டனர்.
வேலூரில் இருந்து 3 பேர் கொண்ட தடயவியல் வல்லுநர்கள் குழுவும் சம்பவ இடத்தில் ஆய்வு மேற்கொண்டனர். மருத்துவக் குழு வருகைக்குப் பின்னர், இன்று பிற்பகலில் சடலங்களை தோண்டியெடுக்கும் பணி தொடங்கும்.
இதனிடையே, காதலித்து திருமணம் செய்து கொண்டாலும், கணவர் நாள்தோறும் குடித்துவிட்டுவந்து சித்திரவதை செய்ததாகவும், இதனால் வேறு வழியின்றி கொலை செய்ததாகவும் தீபிகா வாக்குமூலம் அளித்ததாக சொல்லப்படுகிறது. கணவனை கொலை செய்த பிறகு, கொலையாளியின் பிள்ளை என பாதிப்பை சந்திக்க நேரிடும் என்பதால் குழந்தையையும் கொலை செய்ததாக தீபிகா தெரிவித்ததாகவும் கூறப்படுகிறது.
இருப்பினும், கொலைக்கான காரணம், கொலை நடந்தது எப்படி மற்றும் கொலை செய்ய பயன்படுத்தப்பட்ட கருவி குறித்து தீபிகாவிடமும், அவரது உறவினர்களிடமும் போலீசார் தீவிர விசாரணை நடத்தி வருகின்றன. கணவனையும் குழந்தையையும் கொன்று, 20 வயது பெண்ணான தீபிகா மட்டும் தனி ஆளாக சடலங்களை புதைத்திருக்க முடியாது என கருதும் போலீசார், இதற்கு வேறு யாரேனும் உடந்தையாக இருந்தார்களா என்றும் விசாரித்து வருகின்றனர்.