’ஆல் பாஸ்’ திட்டத்தில் மாற்றம்- நாடாளுமன்றத்தில் மசோதா தாக்கல்...

கட்டாயக் கல்வி பெறும் உரிமை சட்டப்படி, 1 முதல், 8ம் வகுப்பு வரையுள்ள மாணவ - மாணவியர், ‘பெயில்’ ஆக்கப்படாமல், அடுத்த வகுப்புக்கு அனுப்பப்படுவர். இது, அனைவரும் தேர்ச்சி எனக்கூறப்படும் ‘ஆல் பாஸ்’ திட்டம் என்றழைக்கப்படுகிறது.

 இந்நிலையில், இந்த சட்டத்தில் திருத்தம் செய்வதற்கான மசோதாவை, மத்திய மனிதவள மேம்பாட்டு துறை அமைச்சர் பிரகாஷ் ஜவடேகர், நேற்று மக்களவையில் தாக்கல் செய்து பேசியதாவது: பள்ளிகளில், 5 மற்றும் 8ம் வகுப்புக்கு அனைவரும் தேர்ச்சி திட்டம் ரத்து செய்யப்படுகிறது. ஆண்டு இறுதி தேர்வில் தோல்வியடைந்த, 5 மற்றும் 8ம் வகுப்பு மாணவர்களுக்கு, இரண்டு மாதங்களுக்கு பின், மறுதேர்வு நடத்தப்படும்.

மறுதேர்வில் தோல்வியடையும் மாணவர்களை, மீண்டும் அதே வகுப்பில் படிக்க வைக்குமாறு, பள்ளிகளுக்கு அறிவுறுத்தப்படும். தோல்வி அடைந்த மாணவர்கள், பள்ளியை விட்டு நீக்கப்பட மாட்டார்கள். இருப்பினும், அனைவரும் தேர்ச்சி திட்டத்தை பின்பற்றுவதா, வேண்டாமா என்பது குறித்து, மாநிலங்களே முடிவு செய்துகொள்ளலாம். அதுபோல், தோல்வியடைந்த மாணவர்களுக்கு மறுதேர்வு நடத்துவது குறித்தும் மாநிலங்களே முடிவு செய்து கொள்ளலாம். அதற்கான வழிகாட்டு நெறிமுறைகளை மட்டும் மத்திய அரசு அளிக்கும்.

இவ்வாறு அவர் பேசினார்.

 தொடர்ந்து, ஆல் பாஸ் திட்ட மசோதாவின் திருத்தம் சபையில் ஒரு மனதாக நிறைவேற்றப்பட்டது.